Sjellja me njerëzit: disa këshilla

Çdo shoqëri ka rregullat e veta të mirsjelljes, domethënë veprimet që njerëzit kryejnë kur ndërveprojnë me njerëz të tjerë. Këto rregulla nuk janë të shkruara, por mund të identifikohen sepse shumica e anëtarëve të asaj shoqërie i zbatojnë ato. Në Itali ka disa sjellje të thjeshta që pothuajse të gjithë njerëzit kanë kur takohen dhe ndërveprojnë me të tjerët. Njohja e këtyre sjelljeve do të ndihmojë të sillesh me të tjerët në mënyrën më efektive.

Ja disa shembuj:

Për të kërkuar diçka dhe për të falënderuar dikë, përdor “Per favore” (të lutem) dhe “Grazie” (faleminderit).

Mund të jenë shprehje të njohura pasi përdoren në shumë vende, por edhe në Itali njerëzit përdorin “Per favore “(të lutem) kur kërkojnë diçka. Kur marrin atë që kanë kërkuar, përdorin fjalën “Grazie” (faleminderit). Për shembull, kur porosisin kafe në kafene, njerëzit pyesin “Posso avere un caffè, per favore?” (A mund të më sjellësh një kafe, të lutem?). Dhe sapo marrin kafen, i thonë “Grazie” kamarierit.

Për të përshëndetur dikë përdor “Salve” / “Buongiorno” dhe “Arrivederci“

Njerëzit thonë “Salve” / “Buongiorno” (Përshëndetje/ Mirëmëngjesi ose Mirëdita) dhe “Arrivederci” (Mirupafshim) kur takojnë dikë që njohin, ose hyjnë dhe dalin nga një vend ku ka njerëz që njohin. Nëse situata është joformale dhe njerëzit që takon janë miqtë e tu, një “Ciao!” është e mjaftueshme. Çfarëdo fjale që zgjidh, e rëndësishme është të përshëndesësh.

Kërkim falje

Njerëzit shpesh thonë “Scusi” (formale) ose “Scusa” (joformale) kur aksidentalisht bëjnë diçka që ofendon ose zemëron një person tjetër. Për shembull, nëse shkelin këmbën e një personi tjetër në autobus, ata thonë “Scusi!“. Në këtë mënyrë ai person do të kuptojë se ishte një aksident. “Scusi” ose “Scusa” përdoret gjithashtu për të tërhequr vëmendjen e dikujt që dëshiron ti pyesësh diçka, për shembull: “Scusi, sa che ore sono?” (më falni, sa është ora?) ose “Scusi, sa dove si trova la stazione?” (më falni, a e din ku është stacioni?).

Shiko njerëzit në sy

Në kulturën italiane, shikimi i njerëzve në sy gjatë një bisede është një shenjë e vëmendjes dhe interesit për njëri-tjetrin dhe bisedën.

Mbaj distancë kur flet me njerëz që nuk i njeh mirë

Njerëzit në Itali janë shumë miqësorë. Nëse janë me miqtë dhe familjen, ata flasin me njëri-tjetrin, përqafohen dhe kërkojnë kontakt fizik. Por kjo është ndryshe nëse ata janë me njerëz që nuk i njohin. Në fakt, nëse një person flet me një person që sapo ka takuar, ai përpiqet të mbajë një distancë. Kjo sepse është e rëndësishme që personi të ketë një hapësirë ​​personale për të lëvizur dhe për t’u ndjerë rehat. Afërsia e tepërt me personin tjetër mund të krijojë siklet.

Mbajtja e derës hapur për personin që del ose hyn pas nesh

Mbajtja e derës hapur për njerëzit që hyjnë në një vend menjëherë pas nesh konsiderohet shumë e sjellshme. Pikërisht, duke mbajtur derën e hapur evitojmë që ajo të mbyllet në fytyrën e personit pas nesh dhe në këtë mënyrë tregojmë se kujdesemi për të tjerët.

Flit me tonin e duhur të zërit

Në vende publike dhe ku ka shumë njerëz (si tek mjeku, banka, zyra postare, në tren ose në transport publik) është e rëndësishme të përdorësh një ton të ulët zëri për të shmangur konfuzionin dhe shqetësimin e njerëzve të tjerë. Në këto situata është gjithashtu e rëndësishme të flasësh në telefon me zë të ulët.

Buzëqesh

Njerëzit në Itali priren të buzëqeshin shumë ndërsa përshëndesin, flasin dhe bëjnë aktivitete në grup. Buzëqeshja është simbol i qetësisë dhe mikpritjes. Marrja dhe kthimi i një buzëqeshje është shumë e këndshme në marrëdhëniet me njerëzit e tjerë.