Shëndeti riprodhues: rëndësia e gjinekologjisë

Shëndeti riprodhues është shumë i rëndësishëm për mirëqenien tënde. Kujdesi për trupin dhe kryerja e kontrolleve të rregullta ndihmon në parandalimin dhe trajtimin e problemeve të mundshme. Mjeku specialist që merret me shëndetin e grave quhet gjinekolog ose gjinekologe.

Kush është gjinekologu / gjinekologia?

Gjinekologu / gjinekologia është një mjek që merret me shëndetin e organeve riprodhuese të grave. Të bësh një vizitë gjinekologjike do të thotë të kryesh kontrolle të rëndësishme për të njohur dhe trajtuar probleme të mundshme lidhur me shëndetin tënd.

Është e rëndësishme që këto vizita të bëhen rregullisht, jo vetëm gjatë shtatzënisë, por në të gjitha fazat e jetës, nga puberteti deri në menopauzë.

Në Itali ka gjinekologë burra dhe gjinekologe gra. Kur zgjedh, mendo se cilin preferon dhe me kë do të ndiheshe më rehat gjatë vizitave.

Pse është e rëndësishme të bëhen vizita gjinekologjike?

Vizitat e rregullta gjinekologjike ndihmojnë për:

• Parandalimin dhe trajtimin e infeksioneve dhe sëmundjeve seksualisht të transmetueshme.
• Kontrollin e ciklit menstrual dhe zgjidhjen e problemeve të mundshme.
• Marrjen e këshillave mbi kontracepsionin.
• Monitorimin e shëndetit gjatë shtatzënisë ose marrjen e ndihmës për të mbetur shtatzënë në rast vështirësish.
• Kryerjen e kontrolleve për parandalimin e tumoreve si ai i qafës së mitrës dhe i gjirit.

Kur duhet bërë vizita gjinekologjike?

Rekomandohet të bëhet vizita e parë gjinekologjike gjatë adoleshencës ose kur fillon jeta seksuale. Më pas është e rëndësishme të bëhen kontrolle të rregullta të paktën një herë në vit, ose në rast problemesh si:

• Dhimbje të forta gjatë ciklit menstrual.
• Cikle menstruale të parregullta.
• Nëse je seksualisht aktive.
• Në rast sekrecionesh anormale ose infeksionesh.
• Vështirësi për të mbetur shtatzënë.
• Çrregullime gjatë shtatzënisë ose menopauzës.

Cilat ekzaminime mund të bëhen?

Gjatë vizitës gjinekologjike, mjeku mund të kryejë disa analiza të rëndësishme:

• Pap test: për parandalimin e tumorit të qafës së mitrës.
• Ekografi pelvike: për kontrollin e mitrës dhe vezoreve.
• Teste për infeksione seksualisht të transmetueshme.

Ku mund të gjesh një gjinekolog ose gjinekologe?

Në Itali mund të gjesh gjinekologë në consultori (qendrat e këshillimit), në spitale dhe në klinika private.

Në consultori, vizitat janë falas ose me kosto të ulët dhe stafi mund të ofrojë mbështetje në disa gjuhë.

Ja edhe mënyra të tjera për të gjetur gjinekologun/gjinekologen tënde të besuar:

1. Mjeku i familjes: nëse ke një medico di base (mjek të përgjithshëm), mund t’i kërkosh atij ose asaj të të rekomandojë një gjinekolog.
2. Miqtë ose familjarët: mund të pyesësh persona të besuar për rekomandime bazuar në përvojat e tyre. Gjithsesi, zgjidh gjithmonë një mjek me të cilin ndihesh rehat dhe të cilit i beson.
3. Online: mund të kërkosh edhe në internet për mjekë pranë teje, të lexosh vlerësime dhe të rezervosh takime. Edhe spitalet dhe qendrat e këshillimit kanë faqe ku mund të gjesh informacion mbi mjekët e disponueshëm.